تطورات مهمة في سوق الدهب.. إيه اللي بيحصل في محلات الصاغة والأسعار رايحة على فين؟

نايس كورة يكتُب.. هو إيه بالظبط  اللي بيحصل في سوق الذهب في مصر؟ ليه الأسعار بدأت تنزل فجأة بعد ما الكل كان متوقع إنها هتوصل لأرقام خيالية؟ وإيه تأثير مفاوضات الصين وامريكا على أسعار الدهب العالمية؟.. وهل وقف إطلاق النار بين الهند وباكستان ممكن يخلي الدهب يتراجع أكتر؟

سوق الدهب في مصر بيمر بحالة من التقلبات خلال الفترة الحالية.. لو بتتابع الأسعار.. أكيد لاحظت إن جرام الدهب عيار 21.. اللي هو الأكتر شهرة في مصر.. بدأ ينزل بشكل ملحوظ..  سعر الجرام عيار 21 حاليا حوالي 4725 جنيه للبيع و4700 جنيه للشراء.. وده بعد ما سجل تراجع بحوالي 90 جنيه عن بداية الشهر.

طب إيه السبب ورا النزول ده؟ 
الدهب في مصر بيتأثر بعاملين أساسيين.. الأول هو سعر الدهب في السوق العالمي.. والتاني هو سعر الدولار مقابل الجنيه.

خلينا نبدأ بالسوق العالمي .. الدهب عالمياً كمان بيشهد تراجع .. سعر الأونصة دلوقتي حوالي 3324 دولار .. بعد ما كان قريب من 3400 دولار من كام يوم .. التراجع ده بدأ يوم 7 مايو لما الأسواق حسّت بتفاؤل بسبب بدء المفاوضات التجارية بين أمريكا والصين.

طب إيه علاقة المفاوضات دي بالدهب؟

لما بيكون في توترات تجارية أو اقتصادية .. زي اللي كانت بين بكين وواشنطن .. المستثمرين بيروحوا للدهب كملاذ آمن .. لأنه بيحافظ على قيمته في الأزمات .. لكن لما بيبقى في أمل إن الدول دي ممكن يتفقوا .. الخوف بيقل .. والناس بتبيع الدهب وتروح لاستثمارات تانية زي الأسهم .. وده اللي خلّى أسعار الدهب تنزل عالمياً .. وطبعاً .. ده بيأثر على الأسعار في مصر على طول 
في مصر .. الدهب مش بس بيعتمد على السعر العالمي .. لكن كمان على سعر الدولار .. لأن قيمة الجنيه قدام الدولار بقت أقل بكتير عن زمان .. فحتى لو الدهب نزل عالمياً .. الأسعار في مصر ممكن متنزلش بنفس القوة .. لكن الفترة دي .. التراجع العالمي كان كبير .. فأثر على السوق المحلي بشكل واضح.

نيجي لنقطة تانية .. وقف إطلاق النار بين الهند وباكستان .. هل ممكن يأثر على أسعار الذهب؟

أكيد أيوه .. بس التأثير مش كبير زي المفاوضات التجارية .. لأن التوترات بين الهند وباكستان .. زي اللي بتحصل في كشمير .. بتخلي المستثمرين يخافوا ويشتروا دهب .. لكن لما بيحصل تهدئة .. الطلب على الذهب بيقل .. وده ممكن يخلي الأسعار تنزل شوية .. بس التأثير ده بيكون محدود قدام عوامل أكبر زي قرارات البنك الفيدرالي أو التوترات الاقتصادية العالمية.

طب الدهب هيروح فين الفترة الجاية؟

السوق دلوقتي بيتحرك بناءً على حاجات كتير .. لو المفاوضات بين أمريكا والصين مشيت كويس وقلّت التوترات .. الدهب ممكن يفضل نازل أو يستقر .. لكن لو حصل أي أزمات جديدة .. أو لو الفيدرالي قرر يثبت أسعار الفايدة .. الدهب ممكن يرجع يطلع تاني.

فلو بتفكر تستثمر في الذهب .. لازم تتابع الأخبار الاقتصادية كويس .. لأن الدهب مش مجرد سلعة .. ده استثمار بيتأثر باللي بيحصل في العالم .. خلّي عينيك على تحركات الدولار والأحداث الدولية.