لقاء الخميسي: اتخنت.. وبكلم أبويا “الله يرحمه” وبيرد عليا

متابعة بتجــرد: أكدت الفنانة لقاء الخميسي أنها لم تتخط حتى اللحظة أزمة وفاة والدها بعد صراع مع مرض السرطان، وقالت إنها تتكلم معه يومياً، وتسمع صوته وهو يرد عليها، كما كشفت لقاء عن تجربة خيانة واحدة تعرضت لها أثناء تواجدها في المعهد، كما تحدثت عن أسباب نجاح زيجتها من محمد عبد المنصف.

وأضافت خلال لقائها مع الفنان تامر شلتوت في برنامج In Deep في العمق: قائلة: “الطفولة كانت جميلة ولما بفتكر الطفولة أول حاجة بفتكرها بابا، أنا بموت فيه هو الرجل الأول والأخير وبعد كدا يجي في النص شوية رجالة.

وواصلت قائلة: ولما بنتكلم عن الأب أنا بشوف بابا صحبي وصديقي اللي مبخبيش عنه حاجة وبشوفه راجل مختلف وفنان وحساس وراقي وطيب كل الصفات الحلوة لما بيتعصب بتبقى الدنيا وحشة وهو صوتي الداخلي بكلمه لحد دلوقتي وهو بيرد عليا، وبكلمه كل يوم وبحكي له الحاجات الحلو والوحشة وبتحصل علامات فبقول أه ده رد وهو طبعا إنسان مش موجود بس بيكون في علامات.

وكشفت لقاء الخميسي تفاصيل تعرضها للخيانة، أثناء فترة ارتباطها من شخص بمرحلة دراستها بالمعهد، إذ أشارت إلى أنها كانت تعلم بعلاقاته النسائية الكثيرة، ولم تعترض عليها، لكن بعد علمها بخيانته تركته بشكل نهائي، ولم تخبره بسبب اختفائها.

وتابعت قائلة: دخلت في علاقات فاشلة، واتعلمت منها إن مش كل اللي أنت عايزه هتاخده، هتاخد الراجل اللي تتكيف معاه، أنت هتحبه بعبله.. بالحاجات الكويسة وغيرها، مش هتقدر تلاقي شخص راسمه في خيالك.

وتابعت لقاء الخميسي: “عبد المنصف مش شبهي خالص، مفيش حاجة شبه بعض فيها غير إننا إحنا الاتنين طيبين.

وتابعت الخميسي: على مدار حياتي متخانتش من أصدقاء كتير، لأني باخد بالي بصاحب مين، فيه ناس ضربت من تحت الحزام، بس مش مهمين في حياتي، وفي ناس مهمة خانتني، وزعلت وقعدت في البيت وعانيت، لكن تعاملت معاهم بالبلوك ومردتش على إهانتهم، لإني عارفة إني من جوايا كبيرة وميصحش أرد.

وأضافت الخميسي: “سكتّ 7 سنين على الإهانة، لا تؤذيني في مشاعري، في ناس لفت من ورايا عشان تاخد أدواري في بعض الأعمال الفنية، بس دلوقتي بقيت بسامح، بتعامل إنه مش من نصيبي، إحنا جايين الدنيا علشان نتعلم، طول ما بغلط بتعلم”.